Текст песни Гр. Салатавия - Альхlамду дуе, Аллагь

АлхIамду дуе, Аллагь, авал-ахир гьечIев Хан,
Халикълъун тIаса инчIев махлукъаталъул МагIбуд,
Дур гIицIаб заталдасан Расуласул нур бижун,
Нахъияб гIаламалъул, гьеб нур аслу гьабурав!
Гьеб берцинаб нуралда МухIаммадан цIар тарав,
ТасбихI гьабун гьеб нуралъ Дур кIодолъи цIунарав,
Лъабкъоялда анцI-азар сон гьеб куцалда индал,
Миръатул хIаят бижун нуралда цебе ккурав!
Цинги жиндирго гьайъат гьеб нуралда бихьидал,
Берцинлъи, цIакъго тIокIаб, тIавусалъул батидал,
Дудаса гIемер нечон гIиркъалъул асар бегьун
Балагьизе кIвечIого Дуй суждаби гьарурав!
Гьеб нуралъ Дуй гьабураб щуябго сужда рикIкIун,
Щибаб къойил щуго как камил гьабун тIобитIи
ТIагьаясе сайгъатлъун, умматалъе рахIматлъун,
МигIражалъул сордоялъ парзлъун тIадкъай гьабурав!
Цинги гьеб тIавусалъул суратияб нуралда
Бан тараб гIетIалдасан ЛавхIгин Къалам бижарав.
«Ла илагьа илла ллагь, МухIаммад - Расулуллагь»
ЛавхIалда хъвазе тIамун Къалам хIайран гьабурав!
Гьесул хиралъи, тIокIлъи халкъалда загьирлъизе,
Хириязул камилав Расул вукIин тIатине,
ТIолго махлукъаталъул саййид гьев вукIин лъайзе
Гьесде тIоцебе салат дуцаго битIун тарав!
Нужоцаги битIеян аят рещтIун кIалъарав,
“Саллу гIалайгьи”, - абун, амру берцин гьабурав,
ЦохIо салават битIун ТIагьа кIодо гьавуни,
Гьесде анцIго битIизе Дуца къотIи гьабурав!
Гьанже хирияб салат-салам дуде, Авараг,
Агьлу мун вукIин лъайдал битIизин нижецаги.
Амруялда нахърилълъун, ризаллагь матIлуб гьабун,
ТIамизин дуде ахIи, уммат хирияв ХIабиб.
Мавлая свалли ва саллим даиман абадан,
ГIала ХIабибика хайри-л-халкъи куллигьими!
Даимаб, абадияб свалат-салам лъе, Аллагь,
Халкъалъулго хирияв Дур ХIабиб – АхIмадида!